Premier League hmaikal vialte lak ah minthang a rak simi Arsenal Captain hlun Henry nih tukum season ah a tlingbik Premier League hmaikal pakhat a chim. A nih cu tukum chung ah goal 32 tiang a thun kho mi Salah a si lo, Spur caah goal 30 tiang a thun kho mi Hery Kain zong a si fawn lo Liverpool Hmaikal a si mi Firmino tu a si tiah a chim.


Firmino cu tukum season Liverpool caah Premier League goal 15 tiang a thun khawh i, a hawi le caah goal 7 a siam piak hna. Goal a thun mi lak ah Mancity hnukham John Stone cu body hmang in goal a thun mi a dawh bik tiah mipi nih an ti. Cun Liverpool manager Klopp i Gegenpress celh ning ah a tha bikin a cawlcang kho i, amah ruang ah an i celh ning zong zoh a nuamh khunnak a si.


Sky Sport ah Henry nih “Firmino cu hnukham pawl kar lak i a cawlcangh ning a that  caah M.Salah zong a duh ning in a cawlcangh khawh nak a si. Cucaah Farmino cu tu lio Premier League ah a thiam bik hmaikal a si ko. Mah ti ka chim ruang ah goal thun a thiam bik ka ti duhnak si lo, a thazang tha bik ka ti duhnak zong a si fawn lo. Sihmanh sehlaw hmaikal pakhat nih ngeih a herh taktak mi thiamnak tling tein a ngei mi a si” tiah a chim.


Firmino cu a luan cia kum ah ramkhat celh tti hawi a si mi Courtinho he an i celh ning an rak tha tuk. Courtinho nih club dang a thial tak hnu zong ah Mane, Salah hna he tha deuh chinchin in le zoh dawh tak in a celh ti kho mi an rak si. Cucaah goal a thun mi record, midang ca goal a siam piak mi record hna zong tukum ah a that khun nak a si.

#SMH

Add comment