Spain ram, Madrid khua cu vawleicung minthang club (2) a si mi Real Madrid le Atletico Madrid hna ruang ah a min thang khun mi khua a si. European i minthang team (2) cu Madrid khua ah a um mi an si i Madrid khua pakhatnak club si ding in a zuam cuahmah mi zong an si.


Tukum season ah mah club (2) nih cun Madrid khua minthat ter nak ding caah ruahchannak thabik a ngei mi an si. Mah chung ah Real Madrid cu European zuamnak lak ah a sang bik a si mi Champions League ah final a phan. Real Madrid  lawng si lo in Atletico Madrid zong a dang European zuamnak pakhat a si mi Europa League ah Final a phan mi a si ve. Madrid khua inntek club (2) nih European a sangbik zuamnak hmuhhma cio ah final chuih ding an si.


Atletico Madrid cu May (16) Europa League Final ah Marseille club he aa zuam ding an si. Cun ni (10) a rauh hnu ah Real Madrid zong Premier League club a si mi Liverpool he aa zuam ding an si ve. Tukum chung ah Madrid khua inntek club (2) nih champion an si cun 1994 kum hnu in Khuakhat ah a um timi club (2) nih European zuamnak ah champion a la kho mi tuanbia a tial ve ding an si.


A luan cia kum (24) lio ah AC Milan nih Athens khua Champion League final ah teinak an rak hmu, khuakhat ah khuasa timi Inter Milan club zong nih UEFA Cup an rak co i khuakhat um ti Club (2) nih European zuamnak ah teinak a rak hmu hmasabik club an rak si. AC le Inter Milan tu cu European Super Cup rak i zuam timi a rak um rih lo.


Mah lio caan ah UEFA nih European Super Cup timi min in zuamnak an rak tuah rih lo. AC Milan le Inter Milan caah cun European Super Cup ah voikhatnak khuakhat um ti club (2) sil rak i cuh timi tuanbia an rak tial kho lo.


Tutan ahcun Madrid Club (2) nih European Super Cup ah a voikhatnak bik khuakhat um ti mi club (2) nih sil i cuh ding timi tuanbia thar tial khawh nak ding caan tha an ngei. Real Madrid le Atletico Madrid cu kum 2014 Champions League le 2016 kum champions League final ah a rak i tong mi an si i voi (2) ning tein Real Madrid nih an rak tei hna.

#Ref:Marca

Add comment