Atulio Asian ram ah tuah mi Brunei King Cup ah Myanmar U-21 zong an i zuam lio a si. Myanmar cu Group (A) ah inn tek Brunei an i celh i Myanmar nih (1-0) in an tei hna. Myanmar nih Brunei cu an tei hna ruang ah semi final an kai kho cang. Myanmar nih inn tek Brunei cu an rak tei deuh hrimhrim ko hna. Myanmar U-21 caah  goal cu minutes (34) ah an hmaikal a si mi Zin Min Tun nih a thun piak hna. Mah goal khat tein Myanmar nih an tei nak a si i group chung an i zuam nak ah puai (2) tei, puai (1) i tluk nak thawng in group ah pakhatnak an hmu i Semi Final an kai nak cu a si.


Myanmar team cu Semi final ah Cambodia he i zuam ding an si. Semi final puai cu May (2) zaan lei suimilam 6:45PM ah Brunei ram ah i zuam ding an si. Myanmar team nih final an kai khawh a si cun May (5) ah final i zuam ding a si than lai.


Myanmar team cu Brunei King Cup ah kan hnu kum Champion a la mi an si. Tutan champion kum (2) peh in lak than ding caah timhtuahnak an nei. Myanmar team cu Group chung ah Thai, Timor, Brunei hna he a rak i zuam i Thai he lawng an rak i tluk i Timor cu goal (2-0) in le Brunei cu (1-0) in an rak tei hna.

#ref:duwun#

Add comment